Gure hezkuntza-proiektua euskaran eta euskal kulturan sustraitzen da, eta hortik ingelesa ikastea bultzatzen dugu, murgiltze-proiektuen eta -jardueren bitartez. Horiei esker, gure ikasleek hizkuntzaren gaineko ezagutza hobetu dezakete ingeles hiztunekin, atzerrira bidaiatuz, batxilergoa ingelesez ikasiz edo beste herrialde batzuetako ikasleei harrera eginez.
Academica Corporationekin lankidetzan, goi-mailako zikloko ikasleei diploma Duala® lortzeko aukera ematen dien Donostiako ikastola bakarra gara. Batxilergoko tituluak baliozkotzeko nazioarteko programa ofiziala da eta bi titulazio lor daitezke aldi berean: haien herrialdekoa eta American High School Diploma. Titulazio hori munduko estatu eta unibertsitate guztietan aitortzen dute.
Dual® diploma DBHko 2. maila eta Batxilergoko 1. maila bitarteko edozein ikasmailatan has daiteke. Egin beharreko ikasgai kopurua berbera da kasu guztietan. Dual® diplomari esker ikasleek Europako curriculumean ez dauden ikasgaiak ikas ditzakete, esaterako, argazkilaritza, kriminologia edo psikologia. Horregatik, ingelesa asko hobetzeaz gain, motibazio eta autonomia maila handia ematen die titulazio horrek ikasleei.
Urtero saiatzen gara DBHko bigarren zikloko eta Batxilergoko gure ikasleekin trukea egiten. Trukeak egin ditugu Alemaniarekin, Turkiarekin edo Suediarekin. Gu bisitatzera etortzen diren ikasleek antolatzen ditugun kultur jarduerez gozatzen dute: mendi-irteerak, bisitak hirira, museoetara eta inguruko herrietara bisitak eta ikastolan bertan egiten ditugun beste proposamen batzuk.
Euskal hezkuntza-sistema ezagutzera etortzen diren Danimarkako edo Alemaniako taldeak jasotzen ditugu urtero eta hainbat jarduera egiten ditugu haiekin hizkuntzaren eta euskal kulturaren gainean, hezkuntza-sistemen artean dauden desberdintasunen gainean, tokiko gastronomiaren gainean...
Udan, EKINTZA Ikastola mundu guztiko ikasleentzako zentroa bihurtzen da. Goizetan eskolak jasotzen dituzte eta arratsaldean jarduerak egiten dituzte gure instalazioetan.
