1983

Ikasgeletan informatika txertatzen aitzindaria

1983an lehen ordenagailuak jarri ziren ikastolako ikasgeletan. OHOko 7. eta 8. mailetan -egun, DBHko lehen zikloa- txertatu zen informatika eta pixkanaka hurrengo ikasmailetara iritsi zen. Teknologian aitzindaria izan zen eta horrek erakusten du ikastolak bokazio berritzailea izan duela bere historian zehar.

1984-1985

Instalazioak handitu genituen ikasmaila bakoitzean 2 lerro eskaintzeko

1984an, lehen eraikina handitzeko obrak hasi ziren ikastolan, gero eta matrikulazio-eskaera gehiago zeudelako eta espazio-beharrei erantzuteko.

Eraikin berria 1985eko irailaren 13an inauguratu zen. Handitu ondoren, egungo itxura hartu zuen eraikinak, bi urteko gelak kenduta, horiek gerora egin baitziren. Gela gehiago egiteaz gain, laborategi berriak, plastikako gelak, konferentzien aretoa, aire libreko espazio berriak, gimnasioak eta kirol-instalazio berriak egin zituzten. Ordutik, EKINTZAk bi lerro ditu ikasmaila bakoitzean, Lehen Hezkuntzatik Batxilergora.

1986

EKINTZA Fundazioa sortu genuen eta EIB Eusko ikastola Batza sustatu genuen

1986an sortu zen EKINTZA Fundazioa kultur fundazio pribatua. Hasierako sustatzaileen dohaintzari esker, fundazioa bihurtu zen ikastolaren erakunde jabea eta titularra. Irabazi asmorik gabeko figura juridiko horrek egonkortasun instituzional handia eman zion ikastolari eta hori ezinbestekoa da ikastetxe batentzat.

Urte horretan bertan, fundazioak Eusko Ikastola Batza (EIB) sustatu zuen, ikastola bakoitzaren hezkuntza-proiektu propioak eta autonomia defendatzeko.

90eko hamarkadaren hasieran, beste ikastola batzuen kasuan ez bezala, EKINTZAk eta EIBko ikastolek titulartasun pribatua defendatu zuten, haien hezkuntza-proiektuen defentsan.

EIBri lotutako ikastolek ekarpena egin diote euskararen eta euskal kulturaren defentsari eta kalitatezko hezkuntza-proiektuak garatu dituzte. Horregatik, hainbat erakunderen sariak jaso dituzte.

EIBk 12 ikastola barne hartzen ditu eta ikastoletako ikasle guztien % 25 baino gehiago ordezkatzen dute egun.

1988

Musika Eskola sortu genuen gure eskolaz kanpoko jardueren askotariko eskaintza zabaltzeko

Bere ibilbidean zehar, EKINTZA Ikastolak garrantzi handia eman die eskolaz kanpoko jarduerei, prestakuntza osatzeko. 1988an, guraso batzuen ekimenez, Musika Eskola sortu zen eta 5 irakaslek musikako, solfeoko eta pianoko eskolak ematen zituzten. Hasieratik arrakasta handia zuen eta horri esker proiektua indartu ahal izan dugu. Egun, 13 irakasle daude. Ikasturte bakoitzean, hainbat tailer daude ikasleentzat: musika, musikako hizkera, instrumentuak, abesbatza eta orkestra txikiak.

1997-2004

Gure kudeaketa-ereduari aitortza

1997an, EKINTZA Ikastolak EFQM kudeaketa-eredua ezarri zuen eta, besteak beste, Etengabe Hobetzearen ezarpen sistematizatua ekarri zuen. 2001ean Kalitatearen Saria eman zigun MECek, 2002an zilarrezko Q Eusko Jaurlaritzak eta 2004an urrezko Q. Aitortza horiek garrantzitsuak dira eta kudeaketan dugun kalitatea eta lortutako emaitzak egiaztatzen dituzte.

2000

OLARAIN abian jartzea sustatu genuen

EKINTZA Fundazioak OLARAIN sortzea sustatu zuen. 2000an zabaldu zen unibertsitateko ikasleentzako egoitza eta ikastetxe nagusi baten zerbitzu guztiak eskaintzen ditu.

Fundazioak finantzaketa kudeatu zuen eta erakundea sortzeko lursaila utzi zuen. Gaur egun, jabeetako bat da eta ustiapen horretatik ateratzen dituen etekin guztiak ikastolan inbertsio berriak egiteko erabiltzen ditu.

2001

Helduen abesbatza sortu zen

2001ean, ikastolako helduen abesbatza sortu zen, urtebete geroago egin ziren 25. urteurreneko ekitaldietan parte hartu ahal izateko. Marina Lertxundik zuzendu zuen hasieratik eta abesbatzan gurasoek, Alumniek eta gure inguruneko pertsonek abesten dute.

2002

25. urteurrena ospatu genuen 

2002an, EKINTZA Ikastolaren 25. urteurrena ospatu genuen. Ekitaldi nagusia Kursaal auditorioan egin zen eta sustatzaileen lana, zein hezkuntza-proiektuaren garapenean Ikastolako Guraso Elkarteak egindako ezinbesteko lana aitortu zuten.

2006-2016

Euskaraz bizi gara eta ikasten dugu

2006-2007 urtean, EKINTZA Ikastola eredu linguistiko berri bat ezartzen hasi zen inguruko errealitate linguistikoari erantzuteko. Eredu propioa da eta guk E eredua esaten diogu. Eredu hori ikastolaren egungo proiektu linguistikoaren lehen urratsa izan zen eta euskarazko kalitatezko hezkuntza orokorra proposatzen du, baina bokazio eleanitzarekin: ingelesa adin goiztiarretan txertatu eta presentzia handituz joaten da pixkanaka. Goiko ikasmailetan ikasgai batzuk ingelesez dira. Frantsesa ere eskaintzen dugu, hautazko moduan.

2013

Kirol-instalazio berriak, baita hiriarentzat ere

Kirola eta bere balioak EKINTZA Ikastolaren hezkuntza-proiektuaren zati garrantzitsua dira. 2013an, inbertsio handia egin zen kirol-instalazio berriak egiteko: belar artifizialeko zelaia, futbolean eta hockeyan aritzeko, diziplina hori oso arrakastatsua baita ikastolan; hiru kaleko tartanezko atletismo-pista; gimnasio handi bat; padeleko pista estaliak eta instalazio osagarriak, hala nola aldagelak eta harmaila txiki bat. Horiez gain, ikastolak bazituen dagoeneko saskibaloiko pista, areto futbolekoa eta frontoia.

Donostiako udalarekin egindako hitzarmenaren bitartez, kirol-instalazio berriak donostiarrentzat eskuragarri jarri ziren hasieratik, eskolako orduetatik eta eskolaz kanpoko jardueren orduetatik kanpo.

2015

2 urteko gela sortu genuen

Familien beharrei erantzuteko prest gaude beti eta 2015ean, EKINTZA Ikastolak 2 urteko haurrentzako Haur Hezkuntzako gela jarri zuen abian. Etapa horretarako proposatzen ari ziren aukera pedagogikoak aztertzeko lantalde bat eratu eta gero, ikastolak proiektu pedagogiko propioa garatu zuen. 2 urteko gelak espazio bereizia du, handia eta argitsua eta kanpoko eremu espezifikoa du.

2016

Ordenagailu eramangarrien erabilera arduratsua egiten hasi ginen eta robotika sartu genuen

2016an, ikastolak Gailu 21 proiektua jarri zuen abian ikasleen konpetentzia digitalak lantzeko. Lehen Hezkuntzako 5. mailatik, ikasle guztiek ordenagailu eramangarri bat dute lanerako. Tresna hori pixkanaka erabiltzen dute eta konpetentzia tradizionalen arloko lan intentsiboarekin uztartzen dute, esaterako, irakurketarekin eta eskuz idaztearekin. Urte horretan bertan, robotika ikasgai gisa ezarri zen goiko zikloetan.

2019

Erreleboa ikastolako zuzendaritzan

37 urtez ikastolako zuzendari aritu ondoren, Igancio Marin ikastetxeko talde sortzaileko kideak erretiroa hartu zuen. Zuzendaritza-batzordeak hartu zuen erreleboa eta lidergo kolektiborako kultura berria jarri zuen martxan. Uxue Arrazolak zuzentzen du taldea zuzendaritzan eta Ane Marinek kudeaketan, baina etapa bakoitzeko proiektu metodologikoetako espezialisten laguntza dute.

2022

Aniztasuna eta talentu indibiduala aintzat hartzen ditugu

Ikastolaren proiektu pedagogikoaren etengabeko eguneraketaren barruan, 2022an BATERA metodologikoarekin hasi ginen lanean Lehen Hezkuntzako zikloan. Helburua da Aniztasunari erantzun eraginkorragoa ematea.

Urtebete geroago, filosofia hori bera bigarren hezkuntzara zabaldu genuen eta gaikako proiektuekin ikasteko lehen espazioa sortu genuen. Hala, hainbat ikasketa- edo ezagutza-arlo batera lantzen ditugu.

2023

Energia berdea eta omenaldia hockeyaren bultzatzaileari

2023an, ikastolak eguzki-panelak instalatu zituen egunerokoan erabiltzen duen energia hornitzeko. Isurpenak murrizteaz gain, inbertsio hori jasangarritasuna hezkuntzako balio gisa aplikatzearen adibide argia da.

Urte horretan bertan, ikastolako belar artifizialeko zelaia berritu zen. EKINTZAk zelaia Manolo Pipaoni, ikastolako aita bati, eskaintzea erabaki zuen, kirol hori ikastetxean eta Donostian sustatzeko egin zuen ahalegina eskertzeko.